ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୨୪ତାରିଖରେ ନିଜ ନିର୍ବାଚନମଣ୍ଡଳୀ ହିଞ୍ଜିଳିରୁ ଦଳୀୟ ପ୍ରଚାର ଆରମ୍ଭ କରିବେ। ନବୀନ ନିଜ ପାଇଁ ଭୋଟ୍ ମାଗିବା ସହ ସାଂସଦ ପ୍ରାର୍ଥୀଙ୍କୁ ଶଙ୍ଖ ଚିହ୍ନରେ ଭୋଟ୍ ଦେବାକୁ ଅନୁରୋଧ କରିବେ। ଏହାପରେ ପ୍ରଥମ ପର୍ଯ୍ୟାୟରେ ନିର୍ବାଚନ ହେଉଥିବା କୋରାପୁଟ, କଳାହାଣ୍ଡି, ନବରଙ୍ଗପୁର, ବ୍ରହ୍ମପୁର ଲୋକସଭା ଆସନ ଅଧୀନସ୍ଥ ନିର୍ବାଚନମଣ୍ଡଳୀ ଗୁଡ଼ିକରେ ପ୍ରଚାର କରିବେ। ୨୫ତାରିଖରେ ରାୟଗଡ଼ାରେ ମୁଖ୍ୟମନ୍ତ୍ରୀ ପ୍ରଚାର କରିବାର କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀ ଆଜି ଏକ ବିଜେଡି ଟୋପି ପିନ୍ଧିଥିବା ଫଟୋ ଛାଡ଼ିଛନ୍ତି। ଯାହା ଏବେ ସାମାଜିକ ଗଣମାଧ୍ୟମରେ ଭାଇରାଲ୍ ହେଉଛି। ବିଜେଡି ନେତା ଓ କର୍ମୀମାନେ ତାଙ୍କ ସାମାଜିକ ଗଣମାଧ୍ୟମରେ ‘କ୍ୟାପଟେନ୍ ଇଜ୍ ଏଭର୍ ରେଡି’ ଲେଖି ପୋଷ୍ଟ କରୁଛନ୍ତି। ଏପଟେ ଆସନ୍ତା ୨୫ତାରିଖରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହ ସୋନପୁରରେ ବିଜେପିର ପ୍ରଚାର ଆରମ୍ଭ କରିବାକୁ ଆସୁଥିବାବେଳେ ଏହା ପୂର୍ବଦିନରୁ ହଠାତ୍ ମୁଖ୍ୟମନ୍ତ୍ରୀଙ୍କ ପ୍ରଚାର ଆରମ୍ଭ ହେଉଛି।